প্ৰতি বছৰৰ পৰম্পৰা অক্ষুণ্ণ ৰাখি এক আধ্যাত্মিক আৰু ভক্তিৰসৰ মাজেৰে এই বৰ্ষৰো ১২ ছেপ্তেম্বৰ, ২০২৬ তাৰিখে সৰুপথাৰ মহাবিদ্যালয়ত অসমীয়া সমাজ জীৱনৰ প্ৰাণ-প্ৰতিষ্ঠাতা মহাপুৰুষ শ্ৰীশ্ৰীশঙ্কৰদেৱৰ তিথি অতি শ্ৰদ্ধাৰে উদযাপন কৰা হয়। মহাবিদ্যালয়খনৰ ছাত্ৰ-ছাত্ৰী, শিক্ষক-শিক্ষয়িত্ৰী আৰু কৰ্মচাৰীসকলৰ উপস্থিতিয়ে দিনটিৰ গুৰুত্ব অধিক বৃদ্ধি কৰে। গুৰুজনাৰ মহান আদৰ্শ আৰু অৱদানক সুঁৱৰি সকলোৱে একগোট হৈ গভীৰ ভক্তিভাৱেৰে নাম-প্ৰসংগ কৰে।
মহাবিদ্যালয়খনৰ ছাত্ৰ-ছাত্ৰীসকলে বৰগীত আৰু দিহানাম প্ৰতিযোগিতাৰো এক সুন্দৰ আয়োজন কৰে। খোল-তাল আৰু ডবা-শংখৰ ধ্বনিৰে মুখৰিত হৈ পৰা মহাবিদ্যালয়ৰ চৌহদটোৱে এক সুন্দৰ বৈকুণ্ঠপুৰীলৈ ৰূপান্তৰিত হয়। প্ৰতিযোগিতাত অংশগ্ৰহণ কৰা ছাত্ৰ-ছাত্ৰীসকলৰ সুৱদী কণ্ঠৰ বৰগীত আৰু ভক্তিপ্ৰাণ দিহানামে উপস্থিত সকলোৰে মন-প্ৰাণ চুই যাবলৈ সক্ষম হয়।
বৰ্তমানৰ আধুনিক সমাজ ব্যৱস্থাত নৱপ্ৰজন্মৰ মাজত দেখা পোৱা এনে আধ্যাত্মিক জীৱন-চৰ্যা, সংস্কৃতিপ্ৰেম আৰু গুৰুজনাৰ প্ৰতি থকা অকৃত্ৰিম শ্ৰদ্ধা-ভক্তি সঁচাকৈয়ে এক আশাব্যঞ্জক বিষয়। ছাত্ৰ-ছাত্ৰীসকলৰ মাজত গুৰুজনাৰ এই অমূল্য কৃষ্টি-সংস্কৃতি আৰু ভক্তিমাৰ্গৰ প্ৰভাৱ ভৱিষ্যতেও যেন এনেদৰেই অব্যাহত থাকে আৰু ই তেওঁলোকক এক সুন্দৰ, নৈতিক তথা শৃংখলাবদ্ধ জীৱন গঢ়াত সহায় কৰিব।
